खटाएको ठाउँमा हाजिरै नभई स्थानीय विकास अधिकारी सरुवा

जिविस निमित्तको पनि निमित्तको भरमा-
कमल थापा, रुकुम, असोज १५- कुनै पनि तल्लो तहदेखि माथिल्लो तहसम्मका कर्मचारीको सरुवा निश्चित अवधिको कार्यकाल बिताएपछि मात्र हुने गर्छ। तर, रुकुमका स्थानीय विकास अधिकारी भने निश्चित कार्यकाल त के खटाएको ठाउँमा एक पाइला नटेकेरै सरुवा भएका छन्।

असारमा रुकुमका तत्कालीन स्थानीय विकास अधिकारी केदारनाथ शर्मा रुकुमबाट सरुवा भएपछि उनको ठाउँमा रामकुमार श्रेष्ठलाई मन्त्रालयले पठाउने निर्णय गरेको थियो। तर, रुकुम आउने भनिएका स्थानीय विकास अधिकारी श्रेष्ठ भने पाइला नटेकेरै उतैबाट सरुवा भएका छन्।

तोकिएका स्थानीय विकास अधिकारी श्रेष्ठ उपस्थित नभएर उतैबाट सरुवा भएपछि रुकुम जिविस ४ महिनादेखि प्रमुखबिहीन बन्दै आएको छ। त्यसयता निमित्तको पनि निमित्तको भरमा चल्दै आएको छ। निमित्तको जिम्मेवारी पाएका योजना अधिकृत शिवकुमार कार्की घर बिदामा गएपछि दोस्रो निमित्तको जिम्मेवारी सूचना अधिकृत चिन्तामणि दाहालले सम्हाल्दै आएका छन्।

जिविसमा लामो समयदेखि स्थानीय विकास अधिकारी नहुँदा विकास निर्माणका योजनाबारे निर्णय हुन निकै कठिन हुँदै आएको छ। नगद भुक्तानी भए पनि स्थानीय विकास अधिकारीले मात्र गर्ने काम कार्वाही प्रभावति हुने गरेका हुन।

नागरिक