रुकुम बन्दले खाद्य संकट

६ साउन, दाङ । उद्योग वाणिज्य संघ रुकुमले गरेको अनिश्चतकालीन बन्दले जिल्लामा खाद्य संकट परेको छ । भत्कीएका सडक मर्मत गर्ने जिल्ला प्रशासन कार्यालयसँग भएको सहमति कार्यान्वयन माग गर्दै संघले सोमबारदेखि जिल्ला बन्द गरेको छ ।

संघको आह्वानमा सदरमुकाम खलङगा, मुख्य व्यापारीक केन्द्र चौरजहारी, रुकुमकोट, बाँफिकोट, बैराग्ाीठाँटी, झुल्नेटालगायतका बजारहरु बन्द भएपछि गाउँहरुमा दैनिक उपभोग्य खाद्य सामाग्रीको अभाब भएको छ । बन्दकर्ताले सदरमुकाममा तरकारी, दुध, दहि लगायतका बस्तुमा पनि प्रतिबन्ध लगाएका छन् ।

रुकुमको झुल्नेटादेखि सदरमुकाम खलङ्गासम्म सडक ग्राभेल गर्दा ठेकेदारले लापर्बाही गरेको र स्थानीय प्रशासनले मर्मतमा चासो नदेखाएको संघले आरोप लगाएको छ । आफूहरुको मागको सुनुवाइ नभएसम्म बन्द जारी रहने उद्योग बाणिज्य संघ रुकुमका कोषाध्यक्ष प्रबिर डाँगीले बताउनुभयो ।