शिक्षण पेसा छोडेर तरकारी खेती

रुकुम,२३ असोज/ रुकुममा एकजना शिक्षकले आफ्नो शिक्षण पेसालाई छोडी कृषि पेसातिर गर्नुभएको छ । नुवाकोट-७ का शिक्षक (हाल कृषक) डिल्लीजङ्ग केसीले पैसा कमाउन विदेश जाने युवालाई चुनौती दिनलाई आफूले यस्तो निर्णय गरेको बताउनुहुन्छ । नयाँ पुस्ताका युवा पैसाकै लागि ऋण काढेर विदेश जान थालेपछि यस्तो निर्णय गरेको हुँ । केसीले भन्नुभयो, विदेशमा गएर धरधरी पसिना चुहाउन लाज नमान्ने तर आफ्नै गाउँघरमा लाज मान्ने प्रवृत्तिलाई चुनौती दिन मैले मेलै यस्तो निर्णय लिएको हुँ । घर व्यवहार धान्नलाई जागिर नै खानुपर्छ भन्ने नभएको बताउँदै कृषक केसीले भन्नुभयो, समाजका अरूलाई पनि आत्मनिर्भर बनाउन उदारहणका रूपमा केही गरेर देखाउनुपर्दछ । आफू शिक्षक जागिरमा छँदाको अवस्था सम्भिदै केसी भन्नुहुन्छ, धेरै काम एउटैले गर्दा कुनै पनि काम राम्रो हुँदैन । दिनभर विद्यालयमा गर्ने जति परिश्रम घरमा गर्ने हो भने त गजबले कमाइ हुँदोरहेछ । नौजनाको परिवार पाल्नका लागि मात्र कृषक नबनेको उहाँको भनाइ छ । ‘जागिर खाँदा आएको पैसा जोगिँदैन्थ्यो, अचेल भने वाषिर्क एक लाख रुपियाँभन्दा बढी बचत भइरहेको छ ।’ उहाँले थप्नुभयो, कृषिलाई पेसाकै रूपमा अँगालेपछि सिजन अनुसार ताजा तरकारी र फलफूल खान पाइएको छ । करिब १० रोपनी जमिनमा सिजन अनुसार मूला, प्याज, रायो, काउली, बन्दगोपी, आलु लगायतका नगदेबालीबाट मात्रै वाषिर्क एकलाख ३० हजार आम्दानी गरेको उहाँले बताउनुभयो । यसरी कृषि पेसामा लागेका केसीले यसभन्दा अघि स्थानीय प्राथमिक विद्यालयमा पढाउँदै आउनुभएको थियो । आफूसँग विदेश जानलाई ऋण माग्न आउने युवालाई सम्झाइबुझाइ गरेर कृषि पेसामा लाग्न उत्प्रेरित गरिरहेको पनि उहाँले जानकारी दिनुभयो । अहिले आफ्नै कारणले सो गाउँका धेरै मान्छे कालापहाडका साथै विदेश जान छोडेको पनि उहाँको भनाइ छ । यो पेसालाई अझै राम्रो बनाउन व्यवस्थित बजार र आवश्यक सामग्री मलखाद, बीउका साथै औषधि पनि सुलभ हुनुपर्नेमा उहाँको जोड थियो ।
Source:nepalportugal.com